MAKALA: Bi Kidude tunu ya taifa.

Na Gadiel Frank Mpungu

Fatma Binti Baraka ndilo jina alilopewa rasmi na wazazi wake, mwanamama shujaa na mwanaharakati wa muziki wa mwambao, Bi Kidude ambaye alizaliwa mwaka 1910.

Mwanamuziki huyu ambaye alifikwa na umauti tarehe 17/ 4 /2013, alikuwa ni mzaliwa halisi wa Tanzania kutoka kule visiwani Zanzibar, ambapo ndipo alikulia huko kabla ya kuanza rasmi safari yake ya muziki ambayo ilimtembeza katika miji mbalimbali na nchi tofauti tofauti barani Afrika na hata nje ya bara hili.

1920, nguli huyu wa muziki wa taarabu aliyekuwa akipinga vikali aina mpya ya upigaji na uimbaji wa muziki huu wa mwambao kabla ya kufariki dunia, alitoroka visiwani Zanzibar na kukimbilia katika jiji la Dar es salaam, kutokana na kutokuwa radhi kuozwa wakati yungali kigoli wa miaka kumi na mitatu.

1930, mwanamama huyu aliyevutiwa na uimbaji wa mtoto wa Sultani wa Zanzibar, Siti binti Saad, aliamua kuitelekeza ndoa yake baada ya mateso aliyodai kuyapata kutoka kwa mumewe na kuamua kujiunga katika kundi la taarabu lililojulikana kama Egyptian Taarab group, ambalo alilitumikia kwa miaka mingi kabla ya kurudi Zanzibar katika miaka ya 1940.

Kinara huyu wa muziki wa mwambao pia alikuwa ni mjasiriamali aliyejishughulisha na utengenezaji wa hina, wanja na vitu vingine vidogo vidogo vya urembo kwa ajili ya wanawake, pamoja na kuwafunda wasichana pindi wanapovunja ungo (unyago), kazi iliyompatia umaarufu mkubwa kisiwani Zanzibar.

Bi Kidude akitumbuiza kwenye unyago.

Pamoja na kuiletea heshima na sifa nchi yetu kwa zaidi ya miaka themanini, msanii huyu mpaka anafikwa na umauti hakuwahi kumiliki nyumba nzuri wala kuishi maisha mazuri ukilinganisha na kazi kubwa aliyokuwa akiifanya enzi za uhai wake.

Aidha hapakuwahi kuwepo na kitabu chochote kilichoandika juu ya maisha ya msanii huyu iwe ndani ya tasnia, au nje ya tasnia kwa maana ya historia yake kwa ujumla, zaidi ya makala fupi fupi kwa mfano wa hii.

Nguli huyu aliyetamba na vibao kama muhogo wa jang’ombe,Yalaiti, Msondo na hatimaye Ahmada, alifanikiwa kupata tunzo mbalimbali kama vile 2005 womex awards, 2012 sports and arts awards ambayo alipatiwa na Rais Jakaya Kikwete pamoja na ile ya 2011 ya Tanzania Music Award ambayo ilikuwa ni ya nyimbo bora ya kushirikiana (featuring song - Ahmada) ambayo alifanya na Offside trick.

Moja kati ya sifa alizokuwanazo mwanamuziki huyu mbobevu, ni kuweza kuimba, kukumbuka mashahiri, kucheza ngoma, kuona vizuri, kusikia vizuri mpaka anafikwa na umauti na kuvuta sigara tofauti na mila na desturi za Wazanzibar na dini yake ya kiislamu.

Bi Kidude katika pozi huku akivuta sigara.

Wahenga walisema, “kila lenye mwanzo halikosi kuwa na mwisho”, hivyo mwezi wa nne mwaka jana ndiyo ulikuwa mwisho wa safari ya mwanamuziki huyu aliyelitikisa bara la Afrika na hata nchi za magharibi, kwa tungo mahiri zilizobuniwa kiustadi na uweledi, ndani ya muziki wa mwambao aliyokuwa akiufanya, kwa zaidi ya miongo minane.

Posted in: